Berria.eus

Asteazkena, 2014ko uztailak 23 - 23:46

2012-05-06

'D3M eta Askatasuna auzia'. Manifestazioa Bilbon

Epaiketa politikoak gelditzeko eskatu dute milaka lagunek

«Herri matrioxkak» antolatzera dei egin du Eleak-ek; erasoak geldiarazi, garai berrian aurrera egin eta herritarrak babestera

Auzipetuen ustez, garai berriaren aurka eraiki den oztopoetako bat da epaiketa

Aitziber Laskibar Lizarribar Bilbo

D3M eta Askatasuna auzia salatzeko manifestazioaren pankartaburua, atzo, Bilboko kaleetan. / JUANAN RUIZ / ARGAZKI PRESS


Auzipetuak, oholtza gainean, amaierako ekitaldian. / JUANAN RUIZ / ARGAZKI PRESS

Hiru matrioxka erraldoien atzean, milaka matrioxka txiki. Tartean, 2009ko hauteskundeetan parte hartzen saiatzeagatik egunotan Espainiako Auzitegi Nazionalean epaitzen ari diren 13 herritarretatik 12. Preso dute hamahirugarrena, eta besarkada berezia jaso du akusatuen aulkietako kideengandik. Eskubide guztiak proiektu guztientzat. Epaiketa politikorik ez! leloa duen pankartari eutsiz joan dira auzipetu gehienak Bilboko Casillatik Areatzako plazara. Eragile politiko, sindikal eta sozialetako ordezkariak gero, eta milaka herritar ondoren.

Alderdi, sindikatu eta gizarte eragileetako ordezkariak elkarren ondoan, adeitsu egin dute ibilbidea, elkarlanak sortzen duen konfiantzaren erakusle. Bertan izan dira, besteak beste, ezker abertzaleko Pernando Barrena, Rufi Etxeberria eta Maribi Ugarteburu, EAko Pello Urizar eta Unai Ziarreta, Alternatibako Oskar Matute, Aralarreko Josu Murgia, eta Iker Urbina zein Xabier Mikel Errekondo Amaiurreko diputatuak.

Bertan izan da gehiengo sindikala ere. ELA eta LABeko idazkari nagusi Adolfo Muñoz eta Ainhoa Etxaiderekin batera, EILAS eta ESK-ko kideak. Gizarte eragileek ordezkaritza zabala izan dute, gurpil gainean eraman dituzten matrioxka itxurako irudi handien atzean.

Egurrezko panpina errusiarrak dira matrioxkak. Gogorrak. Bilboko kaleetan ibili diren hiru erraldoietatik bik, haserre aurpegia erakutsi dute: erasoei aurre egiteko jarrera. Irribarrea izan du hirugarrenak, ilusioa eta aurrera egiteko nahia irudikatuta. Hori guztia barnebildu nahi du D3M eta Askatasunaren aurkako auzia salatzeko manifestazioa antolatu duen Eleak mugimenduak. Horregatik egin du «herri matrioxkak» antolatzeko deia. Erkideen aurkako erasoak geldiarazi, bestelako garai baterako bidean aurrera egin, eta albokoak babestekoa. Babes hori biderkatzekoa. Matrioxka bakoitzak beste bat gordetzen, babesten du sabelean, ama batek alaba nola; horrek beste bat dakar barruan irekiz gero, eta beste bat hurrengoak. Etengabeko babes hori sortu nahi du Eleak mugimenduak, eskubide zibil eta politikoen alde.

17:10ean, euripean, hasi da manifestazioa, eta 40 minutu geroago iritsi da Areatzako plazara. Ez, ez, ez, epaiketarik ez! oihukatuz sartu da plazan protesta. Demokrazia Euskal Herriarentzat!. Euskal presoen aldeko aldarriak ere sarri entzun dira. Manifestazioaren burua helmugara iritsi denean, Hurtado Ametzaga kalean zegoen amaiera, Bizkaiko Batzar Nagusien parera iristen.

Iratxe Ibarra bertsolariak «proiektu denen amesteko eskubidea» aldarrikatu du kantuan, eta herrigintza babesteko eskatu, Eleak mugimenduko Zigor Oleagak eta Txerra Bolinagak hitza hartu aurretik. Matrioxkek adierazten duten babesa herriz herri osatzeko eskatu dute horiek: «elkartasunen sabela» sortzeko; «arazo kolektiboaren aurrean babes kolektiboa» eratzeko.

Guztien eskubide zibil eta politikoak aldarrikatu dituzte, demokrazia eskubide horien errespetuak sortzen duela ohartarazita. «Baina zoritxarrez, ezin ditugu eskubide horiek erabili, eta horregatik gaude hemen», adierazi du Bolinagak. Politikan parte hartzeko eskubidea defendatu du bereziki. «Amparo, Iker, Imanol, Eli, Arantza, Hodei, Agurtzane, Unai, Zuriñe, Txiki, Liger, Xabier eta Jose Antonio eskubide hori gauzatzeagatik espetxeratu nahi dituzte», esan du akusatuen aulkian eseri dituztenak banan-banan aipatuta. Txalo zaparrada eragin du aipamenak.

Beste 220

Baina horiek ez direla politika egiteagatik jazarriak izan diren bakarrak ohartarazi dute bi ordezkariek. «Eskubide zibil eta politikoak praktikan jartzeagatik» espetxean edo sasian dauden euskal herritarrak asko direla salatu dute. Eta ia 220 epaiketaren zain daudela arrazoi beragatik. Espainiako «salbuespen legeak» salatu, eta horiei berandu baino lehen aurre egiteko eskatu dute: «Zapaldu nahi gaituzten bi pareten artean hanka jartzen ez badugu, konturatu orduko, mugitzen uzten ez diguten bi hormen artean preso egongo gara».

Eskubide urraketei muga jartzeko premiaz ohartarazi dute, hortaz. Eta, atzoko protesta «euskal matrioxka eraikitzeko pausotxo bat» dela uste duten arren, epaiketa politiko eta eskubide urraketa gehiago egon ez daitezen «pauso askoz gehiago» egin beharko direla abisu eman dute.

Epaituak agertokira igo direnean egin dute txalo gehien manifestariek. Dantzariek auzipetuei matrioxka bat eman, eta Arantza Urkaregik eta Amparo Lasherasek hartu dute hitza. Urkaregik adierazi du epaiketaren zioa politikoa dela hasieratik argi zutela eta lehen bi saioen ondoren are argiago geratu dela. Akusazio bakarrak egitasmo politikoak gauzatzean oinarritzen direla, eta poliziek egiaztatu dutela «proiektu politiko baten garapena oztopatzeko» lana zutela. Horretarako, 2006tik jarraitu zituzten auzipetuak, D3M 2009an sortu zen arren.

Ondorio batera iritsi da akusatua: Euskal Herrian aro berri bat marrazten ari den arren, Espainiako Gobernuak salbuespeneko politikei eutsi nahi die. «Beraiek iraganeko argudio eta politikei eusten diete; guk, politika egiteko aukera bermatu nahi dugu; politika aukera berdintasunean egin, Poliziaren jazarpenik eta legez kanporatzerik gabe».

Lasherasek berretsi du epaiketara lasai joango direla astelehenean ere; guardia zibilek independentzia eta eraldaketa soziala delitutzat nola jotzen dituzten entzungo dutela berriz ere, baina epaituek eskubide zibil eta politikoa egingo dutela haien aurrean.

Garai politiko berria egonkortzearen alde aritzeko deia egin du, «bidea alboratzeko helburua duten oztopo asko» egongo direla jakin arren. Hain zuzen, D3M eta Askatasunaren aurkako epaiketa oztopo horietako bat dela uste du, baita Espainiako auzitegiek hartutako beste erabaki batzuk ere. Oso gaixo dagoen Txus Martin presoari beste 36 urteko espetxe zigorra jarri izana eta Igor Katxorro bi urterako kartzelatu izana ditu adibide. «Agian bide berri honi oztopo gehiago jartzen saiatuko dira, baina guk aurrera jarraituko dugu», adierazi du, herritarrek emandako babesa eta «indarra» eskertuta.



 

Auziaren epaiketak bihar izango du segida

Arantza Urkaregi, Eli Zubiaga, Iker Rodrigo, Imanol Nieto, Amparo Lasheras, Agurtzane Solabarrieta, Hodei Egaña, Unai Berrostegieta, Zuriñe Zorrozua, Fernando Antia, Jose Antonio Munduate, Xabier Isasa eta Aitor Ligerzanak akusatuen aulkian eseri beharko dute berriro bihar, ostegunean hasi zen epaiketak segida izango baitu. Epaiketaren lehen bi egunetan bi gauza nabarmen geratu dira: lehena, akusatuek ukatu egin dituztela euren aurkako salaketa guztiak, D3M eta Askatasunan lan soilik politikoa egin zutela eta ez zutela ETAren edo Batasunaren aginduz jardun, baizik eta aukera politiko baten aldeko hautua egin nahi zuten milaka euskal herritarri botoa eman zezaten ahalbidetzeko asmoz jokatu zutela. Fiskaltzak aurkeztutako perituek, aldiz, ez dute froga zehatzik aurkeztu auzipetuen aurka; Fiskaltzak peritu gisa aurkeztu dituen lekukoak, gainera, akusazioen oinarrian dauden txostenen egileak dira.

Bihar, etzi eta etzidamu jarraituko du epaiketak Auzitegi Nazionalean, eta maiatzaren 17an eta 18an ere auzi saioak egingo dira.



 

ESANA. MARIBI UGARTEBURU. Ezker Abertzaleko bozeramailea

«Lan politiko, publiko eta gardena egiteagatik zigorbidean jarri dituzte 13 pertsona hauek»



 

Ertzainen furgonetarik ez, baina helikopteroa bai

Iñigo Cabacas Athleticen zalea Ertzaintzaren gomazko pilota batek jota hil ondoren Ertzaintzaren jarduna kolokan jarri denetik Bilbon egin diren manifestazioetan gertatu den bezala, atzo ere ez zen ertzainik ikusi ez protestaren aurrealdean ez atzealdean. Hala ere, poliziek helikopteroz jarraitu zuten manifestazioa.



 

Protestek ez dute etenik epaituen herri eta auzoetan

Espainiako Auzitegi Nazionalean 13 euskal herritarren aurkako epaiketak aurrera jarraitzen duen bezala, Euskal Herrian aurrera darraite epaiketa salatu eta auzipetuei babesa emateko ekitaldiek. Datozen egunetan ere, hainbat protesta izango dira epaituen herri eta auzoetan. Bihar bertan, esaterako, Bilboko Santutxu auzoan manifestazioa egingo dute 20:00etatik aurrera Egunkaria plazatik abiatuta. Auzokoak dituzten Jose Antonio Munduate eta Xabier Isasari babesa emango diote, bereziki.

Erandiokoa den Iker Rodrigori eta gainontzeko auzipetuei babesa emateko, ostiralean egingo dute manifestazioa Erandion. Gaur egingo dute deialdia agerraldi jendetsu batean.



© Berria.eus - Euskal Editorea S.L.

Martin Ugalde Kultur Parkea, Andoain 20140 43.223785 -2.014929

Telefonoa: 943 304 030 / Faxa: 943 590 172

- www.berria.eus

Lege Informazioa

MIDAS Kontseilua Bai Euskarari

Laguntzaileak:

Eusko Jaurlaritza

Gipuzkoako Foru Aldundia